Օգոստոսի 23 - ին ՀՀ սփյուռքի նախարար Հրանուշ Հակոբյանն այցելեց Երեւանի Ստեփան Շահումյանի անվան թիվ 1 հիմնական դպրոց, որտեղ «Արի տուն» ծրագրի վերջին, 8 - րդ փուլի մասնակիցները հայոց լեզվի եւ հայագիտության արագացված դասընթացներ են անցնում: Հանդիպմանը ներկա էին Երեւանի քաղաքապետարանի հանրակրթության վարչության պետ Գայանե Սողոմոնյանը եւ Ս. Շահումյանի անվան թիվ 1 դպրոցի տնօրեն Կարինե Սաքանյանը: Նախարար Հ. Հակոբյանը շրջեց դասասենյակներով, ուր լեզվի իմացության տարբեր մակարդակներ ունեցող երիտասարդները սովորում են հայերեն, հայագիտության դասեր են առնում, ծանոթանալով հայոց պատմությանը, մշակույթին, լեզվի եւ կրոնի պատմությանը: Ծրագրի մասնակիցները նախարարին ողջունեցին Հայաստանի օրհներգի կատարումով եւ Տերունական աղոթքով, այնուհետեւ ներկայացրին դասընթացի ժամանակ իրենց ձեռք բերած գիտելիքները լեզվի եւ պատմության վերաբերյալ, հանդես եկան հայրենասիրական ստեղծագործությունների կատարումներով: Լեզվի իմացությունը համարելով հայ ինքնության պահպանման կարեւորագույն գրավականը, ՀՀ սփյուռքի նախարար Հ. Հակոբյանը հորդորեց երիտասարդներին լավ սովորել մայրենին, պահպանել այն եւ խոսել միայն հայերեն: Այս նպատակով է, որ «Արի տուն» ծրագրի շրջանակներում իրականացվում են հայերենի արագացված դասընթացներ: Նախարար Հ. Հակոբյանի բնորոշմամբ այս ծրագրի արդյունքները ակնհայտ են լինելու մեկ տասնամյակ անց, իսկ այժմ միայն դրա հիմքերն են դրվում: